Hainbat legazpiarrek Birziklapena bai, atez atekorik ez izenburupean herri plataforma sortu dute, eta bertako kideek aurkezpen ekitaldian esan dutenez, «Bilduk herrian inposatu nahi duen atez ateko hondakin bilketaren aurkako» herritarren bilgunea izango da.
Beraien helburua betetze aldera, bilera izan zuten pasa den astean Kepa Urtzelai alkatearekin, eta hiru eskakizun zehatz egin zizkioten: «Legazpiarren nahia errespetatzeko eta atez atekoa bertan behera uzteko; Legazpin bosgarren edukiontzia jartzeko; eta, azkenik, udalak dituen zerbitzuak errazteko».
Bide batez, herri plataformako kideek, Legazpin jarri nahi duten atez ateko sistemaren aurkako sinadura bilketaren kanpainaz ere hitz egin zuten agerraldian. Dagoeneko, «3.000 sinadura» bildu dituztela jakinarazi zuten. Gainera, datozen egunetan ere sinadura gehiago bilduko dutenaren aurreikuspenarekin, kanpaina datorren igandera arte –uztailak 8– luzatzea erabaki dute.
