Legazpiko Tokiko Agenda 21eko Foroaren bilera berri bat izango da gaur. Urteko bigarrena da eta zaborra izango da eztabaidatuko duten gaia, Legazpin zenbat zabor sortzen den eta zenbat birziklatzen den galderei erantzuteko, besteak beste.
Bilerari 18:30ean emango diote hasiera eta 20:00ak bitartean luzatuko da. Ohi bezala Legazpiko udaleko batzar aretoan bilduko dira eta deialdia herritar guztientzako irekia da. Legazpiko Udalak prentsa ohar bidez jakitera eman duenez, gaurko bileran Sasieta Mankomunitateko gerenteak, Iñaki Erauskinek hartuko du parte.
Zaborra guztion ardura
Zaborraren «sorkuntza eta kudeaketa guztion ardura delako», garrantzitsua iritzi diote Legazpin gaia guztien artean eztabaidatzea. Eta zehazkiago, zaborraren kudeaketaren gaiari dagokionez Legazpiko gaur egungo egoera zein den aztertzea da helburua.
Horretarako hainbat galdera planteatuko dituzte arratsaldeko bilkuran. Legazpiar bakoitzak zenbat zabor sortzen duen, zein izan den azken urteetako bilakaera, sortzen den zabor guzti horretatik zenbat hondakin bideratzen diren bilketa selektibora edo zenbat botatzen den zabortegira, edo datu hauek nola baloratzen diren eta etorkizunari begira zeintzuk diren erronka nagusiak, batzuk aipatzearren.
Goierriko Hitza
Alex Areizaga
Legazpiko Hitza
Josune Zarandona